Oziq-ovqat mahsulotlari eksporti va hujjat aylanishi soddalashtirildi
Bu haqida Prezidentning tadbirkorlar bilan ochiq muloqotida maʼlum qilindi.
Taʼkidlanishicha, bugungi kunda oziq-ovqat mahsulotlarini saqlash, saralash, qayta ishlash uskunalari va butlovchi qismlari olib kelinganda sertifikat olishga uch oy vaqt ketayapti.
Sababi, hududlarda sinovlarni to‘liq qamrab oladigan laboratoriyalar yo‘q. Hamma poytaxtga kelishga majbur.
Mutasaddilarga yil yakunigacha Namangan, Samarqand va Xorazmda sinov laboratoriyasi tashkil qilish topshirildi.
Yana bir masala – hozir tadbirkorlar elektron hisob-faktura va tovar-transport yuk xatini alohida 2 ta hujjat sifatida rasmiylashtirmoqda. Tadbirkor yuk xatiga 49 ta maʼlumotni majburiy kiritishi kerak.
Hamma sohaga raqamlashtirish kirib kelgan bir paytda, bunday amaliyotni bekor qilish vaqti kelgani taʼkidlandi. Endi bu hujjatlar yagona shaklga keltiriladi va faqat 4 ta maʼlumot kiritishni o‘zi yetarli bo‘ladi.
