Toshkentda qalbaki dollar sotmoqchi bo‘lganlar ushlandi
Ular 10 ming dollar soxta pul bilan qo‘lga tushgan.
Huquqni muhofaza qiluvchi organ xodimlari tomonidan Yunusobod tumanida joylashgan “Universam dehqon bozori” oldida o‘tkazilgan tezkor tadbirda fuqarolar N.R., X.A. va boshqalar o‘zaro til biriktirib, Toshkent tumanida yashovchi S.M.dan olib kelgan 100 AQSH dollarlik kupyuradagi qalbaki 10 000 AQSH dollarini fuqaro A.O.ga haqiqiy 7 200 AQSH dollariga sotgan vaqtlarida ushlangan.
X.A.ning yonidan o‘tkazish maqsadida saqlab kelingan yana 75 dona 100 AQSH dollarlik qalbaki kupyuralar ashyoviy dalil sifatida olingan.
Mazkur holatlar yuzasidan JKning 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) bilan jinoyat ishi qo‘zg‘atilib, tergov harakatlari o‘tkazilmoqda.
