Toshkent viloyatida uyida psixotrop dori saqlayotgan shaxs ushlandi
Hozirda holat yuzasidan jinoyat ishi qo‘zg‘atilgan.
Ayni kunlarda Toshkent viloyatida “giyohvandlik va psixotrop dori vositalari noqonuniy aylanmasiga qarshi” keng masshtabdagi nazorat-reyd tadbirlari o‘tkazilmoqda.
Kuni kecha Toshkent viloyati Ichki ishlar boshqarmasi, Toshkent tumani Ichki ishlar bo‘limi va DXX tuman bo‘limi xodimlari tomonidan o‘tkazilgan tezkor tadbirda 1981 yilda tug‘ilgan J.X.ning yashash xonadoni xolislar ishtirokida ko‘zdan kechirilgan.
Natijada xonadon yerto‘lasida 10 dan ortiq turli nom va ko‘rinishdagi, jami 45 965 dona kuchli taʼsir qiluvchi dori vositalari borligi aniqlanib, daliliy ashyo sifatida hujjatlashtirib olingan.
Aniqlanishicha, dori vositalari noqonuniy yo‘llar orqali respublika hududiga olib kirilgan va sotish maqsadida saqlab kelingan.
Mazkur holat yuzasidan ushlangan shaxsga nisbatan Jinoyat kodeksining 251(1) -moddasi 3-qismi bilan jinoyat ishi qo‘zg‘atildi. Tergov harakatlari davom etmoqda.
