“UzAuto Motors” AJga nisbatan ish qo‘zg‘atildi
Maʼlum bo‘lishicha, avtomobil yetkazib berishda qonun buzilishiga yo‘l qo‘yilgan.
“UzAuto Motors” AJ va uning dilerlariga avtomobil yetkazib berish sohasidagi qonunbuzilish yuzasidan tegishli ko‘rsatmalar berildi. Bu haqida Raqobatni rivojlantirish va isteʼmolchilar huquqlarini himoya qilish qo‘mitasi Matbuot xizmati xabar berdi.
Raqobat qo‘mitasiga Qoraqalpog‘istondan fuqaro A.D. o‘ziga tegishli bo‘lgan 2023 yilda “UzAuto Motors” AJ tomonidan ishlab chiqarilgan “Lacetti L-Stayle MT” rusumli avtomobil olinganiga 5 oy ham bo‘lmasdan nosozligi tufayli yonib ketganligini, lekin ishlab chiqaruvchi tomonidan ushbu holat o‘z vaqtida bartaraf etilmayotganligi yuzasidan murojaat qilgan.
Ushbu shikoyat Qo‘mita tomonidan ko‘rib chiqilgandan so‘ng, qonunbuzarlik holati o‘z tasdig‘ini topdi. Bundan tashqari, aynan shu markali avtomobilda yong‘in chiqishi holati Navoiy viloyatida ham kuzatilganligi aniqlandi.
Qo‘mita maxsus komissiyasi tomonidan “Isteʼmolchilar huquqlarini himoya qilish to‘g‘risida”gi Qonunning 14 va 20-moddalari talablari buzilganligi alomatlari asosida “UzAuto Motors” AJ va “PSM-AVTOSAVDO” MCHJga nisbatan ish qo‘zg‘atildi.
Hayotga xavf va sog‘liqqa zarar bo‘lishi mumkinligini hisobga olib, qo‘mita bir vaqtning o‘zida ishlab chiqarilgan ushbu rusumdagi 37 ta avtomobilni texnik ko‘rikdan o‘tkazish uchun 10 kun ichida chaqirib olish majburiyatini oldi.
