Atmosferani ifloslantirgan 117 nafar mansabdorga chora ko‘rildi
Huquqbuzarlar jami 332 million so‘m miqdorida jarimaga tortildi.
Buxoro viloyati Ekologiya, atrof-muhitni muhofaza qilish va iqlim o‘zgarishi boshqarmasi tomonidan atmosfera havosini muhofaza qilish talablarining buzilishiga qarshi doimiy nazorat reyd tadbirlari o‘tkazib kelinmoqda.
Reyd davomida o‘tgan 9 oy ichida jami 1 356 nafar fuqaro tomonidan huquqbuzarlik sodir etilgani maʼlum bo‘ldi. Xususan, huquqbuzarlarning 117 nafari mansabdor shaxslar ekanligi aniqlandi. Ular qurilish chiqindilari va boshqa chiqindi turlarini yoqish, shuningdek, dala va aholi punktlarida xazon, shox-shabbalarga o‘t qo‘yish kabi huquqbuzarliklarni sodir etishgan.
Holat yuzasidan fuqarolarga nisbatan O‘zbekiston Respublikasi MJtKning 88-moddasiga muvofiq maʼmuriy bayonnoma rasmiylashtirildi. Huquqbuzarlar jami 332 million so‘m miqdorida jarimaga tortildi.
Maʼlumot uchun, atmosfera havosini muhofaza qilish talablarini buzishga qarshi reyd tadbirlari davom ettirilmoqda. Bu kabi huquqbuzarliklar qonuniy javobgarlikka sabab bo‘ladi.
