Toshkentda Cobalt avariyaga uchrashi oqibatida haydovchi mashina ichidan chiqib ketdi
YTH yuzasidan rasmiy munosabat bildirildi.
Toshkent shahri Mirzo Ulug‘bek tumani Yangi O‘zbekiston ko‘chasida 16 sentabr kuni soat 08:00 larda YTH sodir bo‘ldi. Mudhish hodisa aks etgan videoda haydovchi mashina ichidan otilib ketgani ko‘rinadi.
Toshkent shahar IIBB Yo‘l harakati xavfsizligi boshqarmasi xabariga ko‘ra, haydovchi, 1991 yilda tug‘ilgan D.A. oq rangli Cobalt avtomashinasini boshqarib ketayotgan vaqtda rul boshqaruvini yo‘qotib, yo‘l chetidagi temir to‘siqqa urilib aylanib ketgan.
Natijada u o‘zi bilan bir yo‘nalishda harakatlanib kelayotgan, 1997 yilda tug‘ilgan A.D. boshqaruvidagi kulrang Cobalt‘ga urilgan.
Hodisa oqibatida oq rangli Cobalt haydovchisi tan jarohati olgan.
Mazkur holat yuzasidan Toshkent shahar IIBB Yo‘l harakati xavfsizligi boshqarmasi masʼul xodimlari tomonidan surishtiruv ishlari olib borilmoqda.
