Joriy yilda O‘zbekistonda tabiatga 25 mlrd zarar yetkazildi
30 mingdan ortiq huquqbuzarga nisbatan chora ko‘rilgan.
18-sentyabr kuni AOKA binosida “Ekologiya vazirligi tomonidan sohada amalga oshirilayotgan ishlar ko‘rsatkichi: erishilgan natijalar va kelgusi rejalar, shuningdek, ekologik taʼlimni rivojlantirish istiqbollari” mavzusida matbuot anjumani o‘tkazildi.
Anjumanda vazirlik tomonidan joriy yilning o‘tgan 6 oyi davomida amalga oshirilgan ishlar yuzasidan maʼlumot berildi.
Qayd etilishicha, joriy yilda atrof-muhitni muhofaza qilish sohasiga oid qonunchilik hujjatlari talablarini buzgan 33 378 nafar shaxslar aniqlandi. Qonunbuzarlarga 35,5 mlrd so‘m maʼmuriy jarima va yetkazilgan zararlar hisoblanib, 28,5 mlrd so‘m undirildi.
Mingdan ortiq korxona va 80 mingdan ortiq fuqarolarga sohaga oid profilaktika tadbirlari o‘tkazildi. 75 ta holat bo‘yicha 160,6 mlrd so‘mlik daʼvolar yuzasidan qonunbuzarlik sodir etgan shaxslarni jinoiy javobgarlikka tortish bo‘yicha materiallar prokuratura organlariga taqdim etildi, shundan 38 ta holatda jinoiy ish qo‘zg‘atildi.
Joriy yil yakuniga qadar Ekologiya nazorat ishlarini amalga oshirish borasida huquqni muhofaza qilish organlar bilan birgalikda 1 000 dan ortiq reyd tadbirlari amalga oshiriladi. 50 mingdan ortiq korxona va tashkilotlarda hamda aholi o‘rtasida huquqbuzarliklar profilaktikasi ishlari olib boriladi.
