Toshkentda issiq suv narxi oshiriladi
Deputatlar qarorni maʼqulladi.
Toshkent shahrida issiqlik taʼminoti xizmatlari uchun tartibga solinadigan narxlar Xalq deputatlari Toshkent shahri Kengashi tomonidan ko‘rib chiqildi.
12 sentyabr kuni qabul qilingan qarorga ko‘ra, narxlar 15 foizga oshiriladi. Jumladan, aholiga issiqlik energiyasi va issiq suv taʼminoti xizmatlarining yangi chakana tarifi 121 617 so‘m/Gkal bo‘ladi.
Shuningdek, yuridik shaxslar uchun tarif ham 15 foizga oshadi — 1 Gkal uchun 244 497 so‘mga.
Yangi tariflarning amalga kiritilish sanasi maʼlum qilinmagan.
Toshkent shahrida issiqlik taʼminoti xizmatlari narxlari aholi uchun so‘nggi marta shu yil aprel oyida, yuridik shaxslar uchun 2023 yil oxirida oshirilgan edi.
Issiqlik taʼminoti xizmatlari Veolia Energy Tashkent kompaniyasi tomonidan ko‘rsatiladi. Shahar aholisi bazaviy tarifning 14 foizini to‘laydi, qolgani shahar byudjetidan subsidiya shaklida qoplanadi.
