Yuqori Chirchiqda haydovchi yo‘lovchiga pornografik video qo‘yib berdi
Hozirda u sud qarori bilan qamalib, jarimaga tortilgan.
Bugun, 20 sentyabr kuni Jinoyat ishlari bo‘yicha Toshkent viloyati Yuqori Chirchiq tuman sudida voyaga yetmagan qizga behayo videolar qo‘yib bergan 27 yoshli erkakka sud hukmi o‘qildi.
Holat 19 sentyabr kuni soat 12:10 larda Yuqori Chirchiq tumani Uch chinor mahallasidan o‘tuvchi yo‘lda sodir bo‘lgan. Haydovchi Nexia rusumli avtomashinani boshqarib ketayotib, 6-cinf o‘quvchisini yo‘lovchi sifatida avtomashinasining orqa o‘rindig‘iga o‘tkazib olib ketgan. Yo‘lda ketayotgan vaqtida qizga o‘zining telefonidan pornografik mazmunga ega bo‘lgan videolarni ko‘rsatgan.
Shundan so‘ng qizcha uning harakatlariga norozilik bildirib, mashinani to‘xtatishni talab qilgan. Haydovchi esa qizni uyatli so‘zlar bilan so‘kib, mashinani to‘xtatgan va yo‘l chetida qoldirgan.
Erkak sud majlisida nima sababdan bunday ish qilganligini tushuntirib berolmasligini, qilmishidan pushaymonligini bildirib, yengillik berishni so‘ragan.
Sud qarori bilan erkak MJtKning 183-moddasi va 189-moddasida nazarda tutilgan huquqbuzarliklarni sodir etganlikda aybli deb topilgan va 15 sutkaga qamalgan. Shuningdek, unga nisbatan BHMning 100 baravari miqdorida, yaʼni 34 mln so‘m jarima jazosi tayinlangan.
