Farg‘onada dorilarni qalbakilashtirayotgan sex fosh bo‘ldi
Hozirda holat yuzasidan jinoyat ishi qo‘zg‘atilgan.
Tezkor tadbir davomida Qo‘qon shahri va Uchko‘prik tumanida yashirin sex dorixonalarda qiymati 7 mingdan 26 ming so‘mga qadar bo‘lgan “Kaspargin”, “Piratsetam”, “Deksamitazon”, “Askorbin kislotasi” kabi ampula shaklidagi dori vositalarini yozuvi, qadog‘i, yorliqlarini o‘zgartirish hamda ampulalarni bo‘yoq bilan bo‘yash orqali dorixonalarda qiymati 70 mingdan 200 ming so‘mgacha bo‘lgan “L-Lizin Essinat”, “Tiotsetam”, “Midokalm”, “Retobolil”, “Diprospan” va “Aktovegen” kabi dorilar tayyorlangan.
Ekspertiza xulosalariga ko‘ra, dori vositalari qalbakilashtirilganligi hamda ularga muvofiqlik sertifikatlari rasmiylashtirilmaganligi va saqlash sharoitiga amal qilinmaganligi aniqlangan.
Maʼlumot o‘rnida, ushbu dorilarning qiymati 89 mln so‘mni tashkil etgan bo‘lsa-da, ularni qalbakilashtirish orqali savdoga chiqarilganida 625 mln so‘mga sotilishi mumkin edi.
Hozirda holat yuzasidan jinoyat ishi qo‘zg‘atilib, tergov harakatlari olib borilmoqda.
