“O‘g‘lim meni tanimay qolmasmikin?”: “Real Sanjik” sudda so‘nggi so‘zini aytdi
Sanjar Karimov qamoqda umrini o‘tkazish og‘ir ekanini taʼkidladi va suddan yana ota va o‘g‘il bo‘lish imkoniyatini so‘radi.
Bugun Toshkent shahar sudining jinoyat ishlari bo‘yicha sudlov hayʼati apellyatsiya instansiyasida «Real Sanjik» nomi bilan tanilgan tadbirkor Sanjar Karimovga oid jinoyat ishi ko‘rib chiqilmoqda.
Sudda so‘nggi so‘zini aytgan Sanjar Karimov hukm nafaqat qonun, balki vijdon tarozisida ham o‘lchanishini istashini bildirdi.
U otasining vafotidan to‘rt oy o‘tib qamalganini aytib, suddan yana ota va o‘g‘il bo‘lish imkoniyatini berishni so‘radi.
«Hayotga bir marta kelamiz. Shu umrni qamoqda o‘tkazish men uchun juda og‘ir. Abdulla Akromovich, siz “qasamyod qilganman” dedingiz. Menga ham yana o‘g‘il, yana ota bo‘lish imkoniyatini bering», — dedi u.
Karimov uyda uni onasi, xotini, o‘g‘li va otasining qabri kutayotganini taʼkidladi.
«Men bir narsadan qo‘rqaman... O‘g‘lim meni tanimay qolmasmikin? Bir kun kelib, o‘g‘limning “dada” degan shirin so‘zini yana eshitishni istayman. Iltimos, o‘sha kun bugun bo‘lsin», — dedi u sudda.
