"Real" La Ligada navbatdagi uch ochkoni qo'lga kiritdi
Jamoa tarkibida yulduzlar o'zlarini ko'rsatishga muvaffaq bo'ldi.
"Real Madrid" bu hafta Chempionlar ligasi doirasida "Shtutgart" bilan qiyin o'yin o'tkazdi. Shuning uchun Anchelotti muhim rotatsiyani amalga oshirdi. 6-tur o'yinida Vinisius zaxira o'rindig'iga joylashtirildi va to'rt himoyachidan faqat Karvaxal asosiy tarkibda maydonga tushdi.
Uchrashuv Bellingemning raqib futbolchisi bilan to'qnashuvida oqibatida jarohat olishi bilan boshlandi. Angliyalik futbolchi mavsum boshini o'tkazib yuborgan, yangi jarohat esa "Real" uchun jiddiy muammo bo'lishi mumkin edi. Biroq, Jude tez orada maydonga qaytdi va o'yinni davom ettira oldi.
Tarkibdagi ba'zi muammolarga qaramay, "Real" juda ham tartibli o'yin namoyish etdi. 11-daqiqadayoq Guler boshi bilan to'pni darvozaga yo'lladi va bu vaziyatda Mbappe gol urishi mumkin edi. Fransuz futbolchisi to'pni o'ziga tog'rilab olib zarba berdi, ammo uning zarbasini darvozabon qaytarishga muvaffaq bo'ldi. Mbappeda boshqa imkoniyatlar ham bo'ldi, lekin baribir gol ura olmadi. "Espanyol" birinchi bo'limda yaxshi himoyalana oldi. Kataloniya jamoasi bu yozda qiyinchilik bilan, bir yillik tanaffusdan keyin La Ligaga qaytdi. Dastlabki turlardan so'ng jamoa turnir jadvalining o'rtasida bormoqda.
Ikkinchi bo'lim qiziq epizod bilan boshlandi. Kurtua kutilmaganda o'z darvbozasiga to'p kiritib qo'ydi. Shu tariqa "Real" aprel oyida "Barselona" Madridga tashrif buyurganidan beri ilk bor o'z uyida to'p o'tkazib yubordi. Shundan so'ng Anchelotti darhol Vinisiusni maydonga tushirdi. Oradan bir-ikki daqiqa o'tgach, madridliklar Karvaxalning goli evaziga hisobni tenglashtirishga muvaffaq bo'ldi. “Espanyol” shu daqiqadan boshlab durang natijani ushlab qolish uchun harakat qildi. Biroq, jamoaga bu yordam bermadi. "Real Madrid"ning bosimi 75-daqiqada urilgan gol bilan yakunlandi. Vinisius chap qanotdan oyog'ining tashqi tomoni bilan ajoyib uzatmani amalga oshirdi va Rodrigo to'pni osongina darvozaga joylab qo'ydi.
Shundan keyin “Espanyol”ning himoyasi parchalanib ketdi. Bu esa mezbonlarga uchinchi golni taqdim etdi. Mbappening golli uzatmasidan so'ng, Vinisius hujumni gol bilan yakunlab qo'ydi. O'yin oxirida Endrik ajoyib tarzda raqibini ortda qoldirib, penalti ishladi. Mbappe esa uni golga aylantirdi - 4:1. Shu tariqa Madrid jamoasi yana bir muhim uch ochkoni qo'lga kiritdi.
