Endi Telegramda qoida buzganlarning raqami tegishli organga beriladi
Bu haqida uning egasi Pavel Durov maʼlum qildi.
Telegram asoschisi Pavel Durov endilikda tegishli qoidalarni buzgan foydalanuvchilarning IP manzillari va telefon raqamlari tegishli organlarga oshkor qilinishi mumkinligini maʼlum qildi. Bu haqida u o‘zining rasmiy kanalida yozib qoldirdi.
“Telegramʼda qidiruv boshqa xabar almashish ilovalariga qaraganda kuchliroq, chunki u foydalanuvchilarga umumiy kanallar va botlarni topish imkonini beradi. Afsuski, bu xususiyatni noqonuniy tovarlarni sotish bilan shug‘ullanadigan odamlar suiisteʼmol qilmoqda.
Jinoyatchilarning Telegram Search xizmatini suiisteʼmol qilishlarini oldini olish uchun biz xizmat ko‘rsatish shartlari va Maxfiylik siyosatimizni yangiladik va ular butun dunyo bo‘ylab izchil bo‘lishini taʼminladik. Qoidalarimizni buzganlarning IP manzillari va telefon raqamlari qonuniy talablarga javoban tegishli organlarga oshkor qilinishi mumkinligini maʼlum qilamiz”, deyiladi xabarda.
