Rossiya 2025-yilda harbiy xarajatlarni 2,8 trillion rublga oshirmoqchi
Kelgusi yilda mudofaa va ichki xavfsizlik uchun jami xarajatlar budjet umumiy xarajatlarining qariyb 40 foizini tashkil qilishi aytildi.
"Bloomberg" nashri bu haqda Rossiyaning uch yillik budjet loyihasiga tayanib yozmoqda. Hujjatda qayd etilishicha, 2025-yilda mudofaa xarajatlari 13,2 trillion rublni (taxminan 145 milliard AQSH dollari) tashkil etadi, 2024 yildagi bu ko‘rsatkich 10,4 trillion rubl bo‘lishi rejalashtirilgan.
Kelgusi yilda mudofaa va ichki xavfsizlik uchun jami xarajatlar budjet umumiy xarajatlarining qariyb 40 foizini tashkil qiladi - bu ta’lim, sog‘liqni saqlash, ijtimoiy siyosat va milliy iqtisodiyot uchun ajratiladigan mablag‘larning umumiy summasidan ko‘ra ko‘proq hisoblanadi.
2025 yilda “maxfiy” budjet xarajatlari 12,9 trillion rublni tashkil etishi rejalashtirilgan - bu 2024-yilga nisbatan 1,8 martaga ko‘p.
Hisob-kitoblarga ko‘ra, Rossiyaning harbiy xarajatlari 2026-yilda YAIMning 5,6 foizigacha, 2027-yilda esa 5,1 foizgacha kamayishi mumkin.
