Toshkentda avtobus ikkita mashina bilan to‘qnashib ketdi
Hodisa oqibatida tan jarohati olganlar bor.
Bugun, 24-sentyabr kuni Toshkent shahrining Olmazor tumanida yo‘lovchi avtobus ikkita avtomashina bilan to‘qnashib ketdi. Bu haqida “Toshshahartransxizmat” AJ maʼlum qildi.
Holat soat 10:10 larda Olmazor tumani Talabalar ko‘chasida sodir bo‘lgan. “King Long” rusumli avtobus haydovchisi ko‘cha bo‘ylab harakatlanib ketayotgan vaqtida Cobalt va Tacker bilan to‘qnashib ketgan.
Dastlabki maʼlumotga ko‘ra, ushbu yo‘l-transport hodisasi Cobalt rusumli avtomobil haydovchisi aybi bilan sodir etilgan. Oqibatda Tracker haydovchisi K.F., undagi ikki nafar yo‘lovchilar yengil tan jarohati olgan. Bundan tashqari, uchala transport ham texnik jihatdan shikastlangan.
Hozirda ushbu yo‘l-transport hodisasi Toshkent shahar IIBB YHXB xodimlari tomonidan o‘rnatilgan tartibda rasmiylashtirilgan.
