Samarqandda erkak jiyaniga zo‘ravonlik qilib kelayotgani aniqlandi
Bola profilaktika inspektoriga murojaat qilsa-da, hech qanday chora ko‘rilmagan.
Samarqandda 2008 yilda tug‘ilgan o‘g‘il bolaga tog‘asi tazyiq va zo‘ravonlik qilib kelayotgani aniqlanib, himoya orderi berildi. Bu haqda bolalar ombudsmani xabar berdi.
Samarqand viloyatining Past Darg‘om tumanida yashovchi, tumandagi maktabning 10-sinfida o‘quvchi voyaga yetmagan B.M.dan murojaat kelib tushgan. Unda ota-onasi ajrashganini, akasi Rossiyada o‘qiyotgani sababli onasi ham u yerga ketganini, o‘zi esa buvisi bilan birga yashashini maʼlum qilgan.
Qo‘shni hovlida yashovchi tog‘asi M.A unga jismoniy tazyiq o‘tkazib, bir necha bor tan jarohati yetkazgani, uni haqorat qilib, uyidan haydab chiqarishga urinayotganini bildirgan. Shuningdek, holat yuzasidan profilaktika inspektoriga murojaat qilsa-da, hech qanday chora ko‘rilmaganini aytib, tog‘asining tazyig‘iga nisbatan chora ko‘rishni so‘ragan.
Bolalar ombudsmani so‘rovi asosida mazkur holat yuzasidan Ijtimoiy himoya milliy agentligi va Ichki ishlar vazirligi tomonidan o‘rganish o‘tkazilgan. Jumladan, agentlikning Samarqand viloyati hududiy boshqarmasi hamda Past Darg‘om tumani “Inson” ijtimoiy xizmatlar markazi masʼullari tomonidan holat joyiga chiqib o‘rganilganda, M.A. tomonidan voyaga yetmagan B.M. va uning buvisi X.M.ga nisbatan tazyiqlar o‘tkazib kelingani tasdiqlangan.
19 sentyabr kuni tazyiq va zo‘ravonlikning oldini olish va qayta takrorlanishiga qarshi himoya orderi rasmiylashtirilgan.
Qayd etilishicha, M.A.ning harakatlariga huquqiy baho berish maqsadida hozirda Past Darg‘om tumani IIB tomonidan tergovga qadar tekshiruv olib borilmoqda.
