30 mingga yaqin obyektga 500 nafar nazoratchi biriktiriladi
Har bir obyekt bo‘yicha kundalik nazorat ishlari kuchaytiriladi.
AOKAda o‘tkazilgan brifingda Qurilish va uy-joy kommunal xo‘jaligi vazirligi axborot xizmati rahbari Saidnosir Usmonov qurilish sohasida davlat nazoratini kuchaytirish bo‘yicha olib borilayotgan ishlar haqida maʼlumot berdi.
Qurilish va uy-joy kommunal ho‘jaligi sohasida nazorat qilish inspeksiyasi joriy yilning o‘tgan davri mobaynida qariyb 30 mingga yaqin obyektda qurilish-montaj ishlari ustidan 145 mingdan ortiq nazorat tadbirlarini olib bordi. Bunda bajarilishi majburiy bo‘lgan 88 600 ta yozma ko‘rsatma berildi, 64 mingga yaqin kamchilik bartaraf etilib, 6 300 dan ziyod maʼmuriy ish xujjatlari asosida tegishli jazo choralari qo‘llanildi. Shaharsozlik norma va qoidalariga zid ravishda qurilgan 338 ta qurilish obyektida qurilish-montaj ishlarini to‘xtatildi. Tegishli hujjatlarsiz o‘zboshimchalik bilan qurilgan 226 ta qurilish obyektini buzish va demontaj qilish bo‘yicha sudlarga daʼvo arizalari kiritildi. Qurilish normalarga rioya qilmagan 279 ta obyektda buzdirish ishlari olib borildi.
Qurilish ishtirokchilar tomonidan mualliflik va texnik nazoratini buzganligi uchun 678 ta holatda litsenziya va ruxsat beruvchi hujjatlarni to‘xtatib turish, tugatish va bekor qilish bo‘yicha taqdimnomalar kiritildi. 519 ta qurilish obyektida sifatsiz qurilish materiallari va buyumlardan foydalanganligi uchun tegishli organlarga taqdimnoma yuborildi.
Taʼkidlash kerakki, shu yilning 23 sentyabr kuni davlatimiz rahbari raisligida bo‘lib o‘tgan qurilish industriyasi va qurilish materiallarini ishlab chiqarishni yana-da rivojlantirishga oid videoselektor yig‘ilishida bu boradagi ishlar tahliliy tanqid qilinib, kelgusidagi vazifalar belgilab berilgan edi.
Shundan kelib chiqqan holda, endilikda 30 mingga yaqin obyektga 500 nafar nazoratchi nomma-nom biriktiriladi. Har bir obyekt bo‘yicha kundalik nazorat ishlari kuchaytiriladi. Aniqlangan xato va kamchiliklarni joyida bartaraf etish maqsadida hududiy inspeksiyalarda quruvchi-operatorlar shtabi tashkil qilinadi. Bu esa inspeksiyalar mansabdor shaxslari hatti harakati hamda qurilish obyektidagi qurilish-montaj ishlarini onlayn nazorat qilish imkonini yaratadi.
Endi nazorat inspektorlari bodikameralar bilan taʼminlanadi. Bundan ko‘zlangan maqsad qurilishda davlat nazoratini yana-da kuchaytirish, har qanday korrupsiyaviy holatni o‘z vaqtida aniqlash va chek qo‘yishdan iboratdir.
Davlat hisobidan qurilayotgan barcha obyektga toifasiga qarab kamida 2 tadan videokamera o‘rnatiladi. Kuzatuv qurilmasi operatorlar shtabiga maʼlumotlarni onlayn yetkazib turadi. Shu orqali qurilish jarayonlari, buyurtmachining texnik, loyihachining mualliflik, pudratchining ichki nazorat ishlari doimiy davlat nazoratida bo‘ladi.
Noqonuniy qurilishlar bo‘yicha mahalla raislari va jamoatchilik nazorati kuchaytirilmoqda. Bu orqali shaharsozlik hujjatlarini rasmiylashtirmasdan, hududiy inspeksiyalar ro‘yxatidan o‘tmasdan o‘zboshimchalik bilan boshlab yuborilgan qurilishlarni o‘z vaqtida to‘xtatish choralari ko‘riladi.
Endilikda har bir qurilayotgan obyekt oldida QR kodli pasport bo‘lishi shart. Agar bunday turdagi pasport bo‘lmasa, qurilish noqonuniy hisoblanadi. Qurilish pasportida qurilishga taalluqli barcha shaharsozlik hujjatlari bo‘lishi shart. Yaʼni, qurilishni joylashtirish, loyihani ishlab chiqish, tasdiqlangan loyiha va shaharsozlik hujjatlari ekspertizasi, hududiy inspeksiyalardan ro‘yxatdan o‘tgan vaqti, qurilishning boshlanish va tugallanish davri, qurilishda buyurtmachi, loyihachi va pudratchilar to‘g‘risidagi maʼlumotlar bo‘lishi talab qilinadi.
Ushbu choralarni kuchaytirish, qurilishlarni sifatli bo‘lishiga, o‘z muddatida topshirilishiga, noqonuniy va pala partish qurilishlarga chek qo‘yishga, inspeksiya xodimlari tomonidan turli nojo‘ya hatti-harakatlar sodir etilishining oldini olishga xizmat qilishi bilan ahamiyatlidir.
