O‘zbekistonda “Yil o‘qituvchisi” tanlovi o‘tkaziladi
G‘oliblarga Prezident sovg‘asi sifatida uy-joy beriladi.
Endi har yili 208 nafar o‘qituvchi 3 xonali uy oladi – bu haqda Shavkat Mirziyoyev pedagog xodimlar bilan bo‘lgan uchrashuv vaqtida maʼlum qilib o‘tdi. Davlat rahbari tomonidan taʼkidlanishicha, bundan so‘ng har yili mamlakat bo‘ylab 208 ta tumanlarning barchasida “Yil o‘qituvchisi” tanlovi o‘tkaziladi va g‘olib chiqqan pedagog xodimlarga uch xonali uy beriladi.
– Taʼkidlash kerakki, yuksak mahoratli, jonkuyar va talabchan o‘qituvchilar – bular ham xalqning, millatning noyob boyligi. Ularning har biri takrorlanmas shaxs. Ularning mashaqqatli, masʼuliyatli mehnati eng yuksak baho va rag‘batga munosib.
Shu bois “Yil o‘qituvchisi”tanlovi o‘tkazilib, 208 ta tuman va shahardan g‘olib bo‘lgan o‘qituvchilarga Prezident sovg‘asi sifatida uy-joy beriladi, – dedi Shavkat Mirziyoyev.
