Samarqand arxitektura-qurilish universitetida yong‘in bo‘ldi
Yong‘inga 6 ta qutqaruv ekipaji jalb qilingan.
Joriy yilning 1 oktyabr kuni soat 23:45 da Samarqand shahar Lolazor ko‘chasida joylashgan Samarqand davlat arxitektura-qurilish universiteti hududida yangidan qurilayotgan (qurilishi tugallanmagan) faollar zalida yong‘in sodir bo‘lgani to‘g‘risida viloyat FVBga xabar berilgan.
Samarqand viloyat FVB axborot xizmati xabariga ko‘ra, 6 ta yong‘in qutqaruv ekipajlari jalb qilinib, voqea joyiga soat 23:54 da yetib borilib, soat 00:30 da yong‘in to‘liq bartaraf etilgan.
Yong‘in natijasida eski qurilish mahsulotlari yonib zararlangan. Hodisa oqibatida jabrlangan va halok bo‘lganlar yo‘q.
Hozirda tergovga qadar tekshirish ishlari olib borilib, yong‘inning kelib chiqish sababi aniqlanmoqda.
