Uzbekistan Airways Iroq va Eron havo hududini aylanib o‘tishini eʼlon qildi
Ushbu chora fuqaro havo kemalari parvozlarining xavfsizligini taʼminlash maqsadida joriy qilindi.
"Fuqaro havo kemalari parvozlarining xavfsizligini taʼminlash maqsadida, 2024 yil 2 oktyabrdan boshlab, O‘zbekiston Respublikasi Fuqaro aviatsiyasi agentligining ko‘rsatmasiga muvofiq, Uzbekistan Airways Iroq havo hududi va Eron havo hududining g‘arbiy qismini aylanib o‘tgan holda, aniq ko‘rsatmaga qadar muntazam parvozlarni amalga oshirishini maʼlum qiladi", — deyiladi xabarda.
Taʼkidlanishicha, Uzbekistan Airways parvozlarning maksimal xavfsizligini taʼminlash uchun muqobil yo‘nalishlardan foydalangan holda Toshkent — Tel-Aviv — Samarqand/Toshkent yo‘nalishi bo‘yicha muntazam aviaqatnovlarni amalga oshirishni davom ettiradi.
1 oktyabr kuni Eronning Isroilga raketa zarbasi berganidan so‘ng, Iordaniya, Iroq va Isroil o‘z osmonini samolyotlar parvozi uchun yopgan edi. Shu bilan birga, Eron aviakompaniyalari ichki va xalqaro reyslarning barchasini bekor qildi. Bundan tashqari, Yaqin Sharqdagi vaziyat keskinlashgani bois, bir qancha aviakompaniyalar Isroil va Livanga parvozlarni to‘xtatdi. Keyinchalik Isroil o‘z osmonini ochganini eʼlon qildi.
