Yangiyo‘lda kobra ilon boqqan shaxs aniqlandi
Ilonlar hozirda ochiqqa qo‘yib yuborilgan.
Ijtimoiy tarmoqda Toshkent viloyatining Yangiyo‘l tumanidagi “Tuyabo‘g‘iz“ MFY hududida ilonlar qo‘yib yuborilgani aytilgan videolar tarqalmoqda. Holat yuzasidan Toshkent viloyati Ekologiya boshqarmasi rasmiy munosabat bildirildi.
Aniqlanishicha, tumanning “Tuyabo‘g‘iz“ MFY hududida yashovchi fuqaro N.Yu. o‘zi yashayotgan xonadonida 30 dan ortiq “Osiyo kobra” ilonlarini tegishli ruxsatnomalarsiz saqlab kelgan. Nomaʼlum sabablarga ko‘ra, fuqaro N.Yu. xonadonida saqlanayotgan ilonlar ochiqqa qo‘yib yuborilgan. Bu holat mahalliy aholi tomonidan aniqlanib, ikkita kobra iloni tutib o‘ldirilgan.
Hozirgi vaqtda ishchi guruh tomonidan shu yaqin atrofda yashovchi aholi xonadonlarida dorilash ishlari olib borilmoqda.
Kobra boqqan shaxsga nisbatan IIB xodimlari tomonidan dastlabki surishtiruv olib borilayotgani maʼlum qilinadi, deyiladi Toshkent viloyati Ekologiya boshqarmasi matbuot xizmati xabarida.
