Toshkent aeroportida 338 mln so‘mlik tilla soat to‘xtatib qolindi
Hozirda mazkur holat yuzasidan bojxona organlari tomonidan jinoyat ishi qo‘zg‘atilgan.
“Dubay-Toshkent” yo‘nalishi bo‘yicha uchib kelgan fuqaroning qo‘l sumkasi ichidan bojxona nazoratiga belgilangan tartibda taqdim etilmagan, jismoniy shaxslar tomonidan olib kirish meʼyoridan ortiq bo‘lgan 1 dona tilla soat borligi aniqlandi.
Ekspertiza xulosalariga ko‘ra, sof vazni 151,69 gramm bo‘lgan ushbu qo‘l soati qariyb 338 mln so‘mga baholanmoqda.
Mazkur holat yuzasidan bojxona organlari tomonidan jinoyat ishi qo‘zg‘atilgan.
Yana bir holatda esa Nyu-Yorkdan uchib kelgan fuqaroga tegishli sumkalar ichida og‘zaki so‘rovda maʼlum qilinmagan, yo‘lovchi bojxona deklaratsiyasida ko‘rsatilmagan “ROLEX OYSTER PERPETUAL DATEJUST” brendiga mansub 156 mln so‘m bo‘lgan qo‘l soati borligi maʼlum bo‘ldi.
Shuningdek, Dubaydan uchib kelgan fuqaroning qo‘l va yo‘l sumkalari ko‘zdan kechirilganda, og‘zaki so‘rovda maʼlum qilinmagan, jismoniy shaxslar tomonidan tovarlarni bojsiz olib kirish meʼyoridan ortiq bo‘lgan “BVLGARI” nomli 1 dona bilaguzuk va 1 dona uzuk borligi aniqlandi.
Maʼlum bo‘lishicha, uning qiymati 71 mln so‘mni tashkil qilmoqda.
Ushbu holatlar yuzasidan Maʼmuriy javobgarlik to‘g‘risidagi Kodeksning tegishli moddalari bilan bayonnoma rasmiylashtirilgan.
Eslatib o‘tamiz, jismoniy shaxslar zargarlik buyumlarini shaxsiy ehtiyoji uchun 65 grammgacha (2 000 AQSH dollaridan oshmagan) bo‘lgan miqdorda O‘zbekiston Respublikasi hududiga bojsiz olib kirishlari mumkin.
