Endi chiqindidan qarzi borlar elektrga to‘lov qilolmaydi
Bu bo‘yicha cheklov amalga kiritilmoqda.
“Hududiy elektr tarmoqlari” chiqindi uchun pul to‘lamagan isteʼmolchilarga ommaviy ravishda SMS yubora boshladi. Ogohlantirishdan keyin ham to‘lovlarni amalga oshirmaganlarning elektr uchun to‘lovlarini qabul qilish cheklab qo‘yiladi.
Qayd etilishicha, “Chiqindilarni boshqarish tizimini takomillashtirish va ularning ekologik vaziyatga salbiy taʼsirini kamaytirish bo‘yicha chora-tadbirlar to‘g‘risida”gi prezident farmonida chiqindi xizmatlari uchun oylik to‘lovlardan qarzdorligi bo‘lgan abonentlarni SMS orqali xabardor qilib borish amaliyoti belgilangan.
Shuningdek, farmonda chiqindi qarzdorligi bo‘yicha ogohlantirilgandan keyin ham to‘lov qilmagan shaxslarning elektr uchun to‘lovlarini qabul qilishni vaqtinchalik cheklash amaliyotini joriy etish ham ko‘zda tutilgan.
Mazkur farmon ijrosini taʼminlash maqsadida joriy yilning oktyabr oyidan boshlab “Hududiy elektr tarmoqlari” AJning 2100 qisqa raqami orqali ogohlantirish xabarlarini yuborish amaliyoti yo‘lga qo‘yildi.
Ayni paytda “Hududiy elektr tarmoqlari” AJ tomonidan chiqindi bo‘yicha ogohlantirish xabari yuborilgandan so‘ng, qarzdorlikni bartaraf etmagan isteʼmolchilarga elektr energiyasi uchun to‘lovlarda cheklovlar kiritish bo‘yicha ham texnik ishlar olib borilmoqda.
