Xorijdagi vatandoshlar uchun 30 ta davlat granti ajratildi
Bu haqida Oliy taʼlim vazirligi xabar berdi.
Davlat oliy taʼlim muassasalarining o‘zbek tili va adabiyoti, tarix, madaniyat, sanʼat va hunarmandchilik yo‘nalishlarida davlat granti asosida o‘qish istagini bildirgan vatandosh-yoshlardan arizalar tegishli oliy taʼlim muassasalari tomonidan 2024 yil 20 oktyabr kuniga qadar qabul qilinadi.
Tanlovlarda ishtirok etish uchun quyidagi talablar belgilanadi:
1) shaxsini tasdiqlovchi hujjatlar asosida o‘zi yoki ota-onasi yoxud bobo-momosi:
➖etnik, til va madaniy-tarixiy nuqtayi nazardan o‘zini o‘zbek yoki qoraqalpoq sifatida identifikatsiya qilgan chet el fuqarosi yoki fuqaroligi bo‘lmagan shaxs bo‘lishi;
➖O‘zbekiston hududida tug‘ilib, istiqomat qilgan, biroq, hozirda xorijda doimiy istiqomat qilayotgan chet el fuqarosi yoki fuqaroligi bo‘lmagan shaxs bo‘lishi;
2) xorijiy fuqaro sifatida yuqorida qayd etilgan bakalavriat taʼlim yo‘nalishlaridan biriga abituriyent sifatida ro‘yxatdan o‘tib, suhbat natijalariga ko‘ra talabalikka tavsiya etilgan bo‘lishi;
3) 30 yoshga to‘lmagan bo‘lishi;
4) o‘zbek tilini bilishi lozim.
