O‘zbekiston oltin-valyuta zaxiralari 41 milliard dollardan oshdi
Markaziy bank zaxiralari ketma-ket uch oydan beri o‘smoqda.
O‘zbekistonning rasmiy zaxira aktivlari sentyabr oyida 1,98 milliard dollarga oshib, 41,139 milliard dollarga yetdi. Bu haqida Markaziy bank tomonidan eʼlon qilingan maʼlumotlarda so‘z boradi.
Markaziy bank zaxiralari ketma-ket uch oydan beri o‘smoqda — iyulda 1,06 milliard dollarga, avgustda 1,75 milliard dollarga, sentyabrda esa 1,98 milliard dollarga oshgan. Bu 2013 yildan beri yuritiladigan statistik maʼlumotlarning butun davri uchun navbatdagi rekord ko‘rsatkich hisoblanadi.
Shuningdek, o‘tgan oyda xorijiy valyuta zaxiralari 518,3 million dollarga oshgan — 8,19 milliarddan 8,709 milliard dollargacha. Zaxiralardagi oltinning fizik hajmi o‘zgarishsiz qolmoqda — 12 million troya unsiyasi (367 tonna). Oltin zaxiralari qiymati 1,46 milliard dollarga oshib, 30,4 milliard dollardan rekord darajadagi 31,86 milliard dollarga yetgan.
Eslatib o‘tamiz, Nyu-York Comex birjasi maʼlumotlariga ko‘ra, oltin narxi 12 sentyabrm kungi savdolar chog‘ida o‘zining tarixiy rekordini yangilagan va troya unsiyasi uchun 2,58 ming dollardan oshgandi. 1 sentyabr holatiga O‘zbekistonning oltin-valyuta zaxiralari 1,75 mlrd dollarga oshib, 39,15 mlrd dollarga yetgan edi. Bu oshish asosan oltin hisobiga ro‘y bergan edi.
