Aliment to‘lamagan aktyor 15 sutkaga qamaldi
Uning qarzdorligi 30 mln so‘mdan oshib ketgan.
Qayd etilishicha, Majburiy ijro byurosining Yuqori Chirchiq tuman bo‘limi ish yurituviga qarzdor U.M.dan undiruvchi Sh.J foydasiga voyaga yetmagan 3 nafar farzandlari taʼminoti uchun 1/2 qism miqdorida aliment undirish to‘g‘risidagi ijro hujjati kelib tushgan.
Bo‘lim davlat ijrochilari tomonidan olib borilgan ijro harakatlari davomida aliment pullari vaqtida to‘lanmaganligi evaziga uning qarzdorligi jami 33 mln 167 ming so‘mni tashkil etishi aniqlangan. Xodimlar unga nisbatan qonuniy chora ko‘rilishi haqida bir necha bor ogohlantirishgan.
Qarzdorning tushuntirishi bo‘yicha u seriallarda aktyor sifatida rol o‘ynab turishi, lekin muayyan ishlash joyi mavjud emasligi, shu sabab yuqoridagi summani to‘lab berish imkoniyati yo‘qligini vaj qilgan. Aktyorligi ish bermagach, madaniyat saroylaridan biriga 0,5 stavkaga qorovul bo‘lib ishga kirgani haqida maʼlumotnoma taqdim etgan, ammo bu ham ish bermagan.
Qarzdorga nisbatan MJtKning 47-moddasi bilan JIB Yuqori Chirchiq tuman sudining qaroriga asosan 15 sutka maʼmuriy qamoq jazosi tayinlangan.
