Islom maʼnaviy merosiga innovatsion yondashuvlar: madaniy meros haftaligi doirasida Qurʼon kuni
Tadbirda 150 ga yaqin mutaxassis ishtirok etmoqda.
Bugun, 19 oktyabr kuni O‘zbekistondagi xalqaro madaniy meros haftaligi "Sharq Renessanslari fenomeni: davlatlar, dinlar, shaxslar va tamaddunlar" doirasida O‘zbekiston madaniy merosini o‘rganish, saqlash va ommalashtirish bo‘yicha Butunjahon jamiyati majlislar zalida "Islom — tinchlik va ezgulik dini" mavzusida xalqaro ilmiy-madaniy simpozium hamda "O‘zbekiston o‘rta asr Qurʼonlari" va "Imom Buxoriy innovatsion muzeyi" loyihalarining taqdimoti bo‘lib o‘tmoqda.
"Islom — tinchlik va ezgulik dini" simpoziumi davomida O‘zbekistonda Prezident Shavkat Mirziyoyev tashabbusi bilan islomiy merosni o‘rganish, saqlash va ommalashtirish bo‘yicha amalga oshirilayotgan islohotlar, jumladan, "O‘zbekistonda Islom sivilizatsiyasi markazi" mega-loyihasi muhokama qilinadi.
Simpoziumdan so‘ng taqdimot qismi boshlanadi, unda Islom sivilizatsiyasi markazi muzeyining "Qurʼonlar zali" va Imom Buxoriy innovatsion muzeyi ko‘rgazmalarini boyitishga qaratilgan g‘oyalar taqdim etildi.
Tadbirda 150 ga yaqin mutaxassis, jumladan, Turkiyadan Turk qo‘lyozmalari assotsiatsiyasi prezidenti Joshqun Yilmaz, BAAdan “Manara” markazi ijrochi direktori Baxita Ahmed Al-Rumaytiy, Fransiyadan Qurʼonshunos, Sorbonna va Parij Oliy amaliyot maktabi doktori, Parij Akademik tadqiqotlar instituti raisi va Milliy ilmiy tadqiqot markazi (CNRS) tadqiqotchisi Karim Ifrak, Islom sanʼati muzeyi va Meros, madaniyat va sanʼat masalalari bo‘yicha Al Midad tashkiloti rahbari Mamduh Usmon, Avstriyadan Müller & Schindler nashriyoti xalqaro marketing va biznesni rivojlantirish bo‘yicha vitse-prezidenti Aleksandr Vilgelm, Turkiyadan Istanbul Islom sivilizatsiyasi saylgohi rahbari va Istanbul Qurʼoni nusxalari muallifi Husayn Qutlu, Iordaniyadan Al-Bayt universiteti shariat fakulteti yurisprudensiya professori Ahmad Yasin Abdel Rahmon, Rossiyadan Davlat Ermitajida qimmatli va arxeologik metallar ilmiy restavratsiya laboratoriyasi rahbari, fan doktori Igor Malkiyel va boshqa dunyo miqyosidagi taniqli ekspertlar ishtirok etmoqda.
Olimlar tomonidan taqdim etiladigan loyihalar qatorida jahondagi turli kolleksiyalarda saqlanayotgan Qurʼonlar faksimil nusxalarini nashr etish takliflari ilgari surilmoqda. Shuningdek, xususiy kolleksiyalardagi qo‘lyozma Qurʼonlar katalogini yaratish va Islom sivilizatsiyasi markazida saqlanayotgan qo‘lyozmalar ro‘yxatini tuzish loyihalari ham taqdim etilmoqda.
Shuningdek, innovatsion texnologiyalardan foydalanish rejalashtirilgan: ilk musʼhaflar uchun yagona platforma yaratish, Usmon musʼhafi va Katta Langar Qurʼonining raqamlashtirilgan elektron versiyalarini yaratish va sunʼiy intellekt yordamida Qurʼon matnini tadqiq qilish orqali islomiy maʼnaviy merosga zamonaviy yondashuvlarni topish bo‘yicha g‘oyalar muhokama qilinyapti.
Bundan tashqari, xorijiy ekspertlar ishtirokidagi ilmiy kengashning kengaytirilgan yig‘ilishi ham o‘tkaziladi, unda Prezident Shavkat Mirziyoyev topshirig‘iga ko‘ra qurilayotgan Imom Buxoriy innovatsion muzeyi bilan bog‘liq g‘oyalar muhokama qilinmoqda.
Shu bilan birga, "Qurʼon: tinchlik, ezgulik va maʼnaviy uyg‘onish yog‘dusi" maxsus kasbiy ko‘rgazmasi ham o‘tkaziladi. Ushbu ko‘rgazmada ekspertlar Islom sivilizatsiyasi markazi va Imom Buxoriy muzeylariga k turadigan eksponatlar bilan tanishish imkoniga ega bo‘ladilar.
