Moldovada saylovlarda ovozlarini “sotgan” fuqarolar jazolandi
Politsiyaga bu bo‘yicha 350 ta murojaat kelib tushgan.
Moldova Korrupsiyaga qarshi kurash milliy markazi 23 oktyabrga qadar politsiyadan bunday huquqbuzarliklar haqida 350 ta xabar olgan holda “passiv saylov korrupsiyasi” moddasi bo‘yicha jami 1 million ley (taxminan 52 ming yevro) miqdorida jarima soldi.
Moldova qonunlariga ko‘ra, “passiv saylov korrupsiyasi” “o‘zi yoki boshqa shaxs uchun saylovda ovoz berish huquqini amalga oshirish yoki amalga oshirmaslik maqsadida saylovchidan o‘ziga tegishli bo‘lmagan har qanday shaklda tovarlar, xizmatlar, imtiyozlarni shaxsan yoki vositachi orqali talab qilish, qabul qilish yoki olish jinoyati hisoblanadi”.
Prezidentlik saylovlarining birinchi bosqichida g‘alaba qozongan Mayya Sandu “demokratiyaga misli ko‘rilmagan hujum” uyushtirilganini eʼlon qildi. "Bizda jinoiy guruh 300 ming ovoz sotib olmoqchi bo‘lganiga oid dalillar va maʼlumotlar bor. Bu misli ko‘rilmagan firibgarlik bo‘lib, bundan maqsad demokratiyaga putur yetkazishdir", — deb bayonot berdi u.
