Shavkat Mirziyoyev Vyetnam bosh vaziri bilan uchrashdi
Muloqotda investitsiya sohalarida hamkorlikni rivojlantirish masalalari muhokama qilindi.
O‘zbekiston Respublikasi Prezidenti Shavkat Mirziyoyev Qozon shahrida bo‘lib o‘tayotgan BRIKS sammiti doirasida Vyetnam Sotsialistik Respublikasi Bosh vaziri Fam Min Tin bilan uchrashuv o‘tkazdi.
Uchrashuvda O‘zbekiston bilan Vyetnam o‘rtasidagi ko‘p qirrali hamkorlik va amaliy aloqalarni, ayniqsa savdo-iqtisodiyot va investitsiya sohalarida rivojlantirish masalalari muhokama qilindi.
Hukumatlararo va idoralararo muloqotlarga tizimli tus berish zarurligi taʼkidlandi. Tomonlar kelgusi yil boshida Xanoy shahrida Savdo-iqtisodiy masalalar bo‘yicha qo‘shma komissiyaning navbatdagi yig‘ilishini, shuningdek, biznes forumi va sanoat ko‘rgazmasini o‘tkazishga kelishib oldilar.
Yangi loyihalarni ilgari surish maqsadida neft-kimyo, elektrotexnika, to‘qimachilik, qishloq xo‘jaligi va boshqa sohalarda sanoat kooperatsiyasini rivojlantirish dasturini tayyorlash taklif etildi. Ishbilarmonlik va sayyohlik aloqalarini, shu jumladan vizasiz tartib joriy etish orqali kengaytirishga alohida eʼtibor qaratildi.
Bo‘lajak oliy va yuqori darajadagi uchrashuvlar jadvali ko‘rib chiqildi. Bosh vazir Fam Min Tin O‘zbekiston Prezidentini rasmiy tashrif bilan Vyetnamga kelishga taklif etdi.
