Imom Buxoriyning 825 yillik “Sahihi Buxoriy” qo‘lyozmasi nusxasi topildi
U Turkiyadagi Pamukkala universiteti kutubxonasida saqlanadi.
O‘zbekistondagi Islom sivilizatsiya markazi va O‘zbekiston madaniy merosini o‘rganish, saqlash va ommalashtirish bo‘yicha Butunjahon jamiyati hamkorligida tashkil etilgan haftalikda Turkiyaning Pamukkala universitetida topilgan Imom Buxoriyning "Sahihi Buxoriy" qo‘lyozmasi haqida so‘z bordi.
Professor Mahmud Yazichining maʼlum qilishicha, mazkur qo‘lyozma 825 yillik tarixga ega bo‘lib, Pamukkala universiteti kutubxonasida saqlanadi. Ushbu nusxa dunyodagi eng qadimiy qo‘lyozmalardan biri sanaladi.
26 oktabrgacha davom etishi belgilangan O‘zbekiston xalqaro madaniy merosi haftaligi davomida bugungacha O‘zbekxon Qurʼoni, Temuriyzoda malika Shodmalik Sulton qo‘li bilan yozilgan Qurʼon musʼhafi, Somoniylar davriga oid Qurʼon qo‘lyozmasi, shuningdek, Boburiylar davriga oid muhtasham albom kabi noyob topilmalar va ilmiy yangiliklar haqida maʼlumotlar berildi.
