Sirdaryoda 13 yoshli bola qarindoshini o‘ldirib qo‘ydi
Holat yuzasidan rasmiy munosabat bildirildi.
Ijtimoiy tarmoqda Sirdaryo viloyatining Boyovut tumanida 13 yoshli maktab o‘quvchisi qarindoshini so‘yib tashlagani haqida xabarlar tarqaldi. Holat yuzasidan Bosh prokuratura matbuot kotibi Hayot Shamsutdinov maʼlumot berdi.
Qayd etilishicha, 18 oktyabr kuni Boyovut tumanida yashagan 23 yoshli F.J. ismli erkakning murdasi Guliston shahar “Navbahor” mahallasi hududidagi kanalning tashlandiq joyidan topilgan. Aniqlanishicha, voyaga yetmagan Sh.A. (o‘g‘il bola) o‘sha kuni “Do‘stlik” va “K-3” kanali oralig‘idagi tashlandiq joydan o‘tib ketayotgan vaqtida uzoq qarindoshi F.J. uni chaqirib, qo‘lidagi pichoq bilan uni o‘ldirishini so‘ragan. Sh.A. buni rad qilganidan so‘ng, F.J. voyaga yetmagan Sh.A.ni qo‘rqitganligi bois, voyaga yetmagan Sh.A. F.J.ni pichoq bilan qasddan o‘ldirgan.
Maʼlumot o‘rnida, marhum F.E. ruhiy kasalliklar dispanserida “paranoid shizofreniya epizodik kechishi” tashxisi bilan ro‘yxatda turgan.
Mazkur holat yuzasidan 18 oktyabr kuni Sirdaryo viloyati prokuraturasi tomonidan Jinoyat kodeksining 97-moddasi (Qasddan odam o‘ldirish) 2-qismi “v” bilan jinoyat ishi qo‘zg‘atilib, dastlabki tergov harakatlari olib borilmoqda.
