Ziroat Mirziyoyeva Bokudagi sammitda ishtirok etdi
Birinchi xonim yoshlarning iqlimga oid tashabbuslarini keng qo‘llab-quvvatlashga chaqirdi.
“Yoshlarning iqlim o‘zgarishi bo‘yicha harakatlardagi yetakchiligi” mavzusidagi forumda O‘zbekiston, Ozarbayjon, Turkiya, Qirg‘iziston birinchi xonimlari hamda yosh ekofaollar qatnashdi, deb xabar qilmoqda O‘zA.
Forumda iqlim o‘zgarishining salbiy oqibatlaridan yosh avlod – go‘daklar, bolalar va o‘smirlar hayotiga katta taʼsir ko‘rsatayotgani, millionlab yoshlar tabiiy ofatlardan, qurg‘oqchilikdan, suv va oziq-ovqat tanqisligidan har kuni aziyat chekayotgani qayd etildi.
— Bu hodisalarga qarshi kurashni yosh avlodsiz, uning ongli va faol ishtirokisiz tasavvur qilib bo‘lmaydi. Ushbu nufuzli minbardan turib, bugun Markaziy Osiyo va Turkiy xalqlar yoshlari ham mana shu global harakatning ajralmas qismi sifatida shakllanayotganini qayd etish menga katta faxr bag‘ishlaydi, — dedi Ziroat Mirziyoyeva.
