Zangiotada voyaga yetmagan qizga shilqimlik qilgan erkak qamaldi
U mashinasida qizga tegajog‘liq qilgan.
Kecha, 19 noyabr kuni Toshkent viloyat jinoyat ishlari bo‘yicha Zangiota tuman sudida voyaga yetmagan G.B.ga nisbatan shahvoniy shilqimlik qilgan K.K.ga nisbatan sud ishi ko‘rib chiqildi.
Aniqlanishicha, huquqbuzar K.K. 2024 yil 17 oktyabr kuni soat 14:20 atrofida avtomashinasida Zangiota tumani tomonga harakatlanib kelayotib yo‘l chetidan ketayotgan voyaga yetmagan G.B.ni ko‘rib, undan Zangiota tumani Bo‘s suv xududiga qanday borilishini so‘ragan. Shundan so‘ng, jabrlanuvchi G.B. unga yo‘l ko‘rsatishini aytib uning avtomashinasiga o‘tirgan.
Huquqbuzar yo‘lning maʼlum bir qismiga yetib borgach avtomashinasini yo‘l chetiga to‘xtatib jabrlanuvchiga shahvoniy shilqimlik qilgan. G.B. qo‘rqib ketib baqirib yuborgan va avtomashinadan tushib qochib ketgan.
Sud hukmiga ko‘ra, sudlanuvchi K.K. MJtKning 41-1-moddasining 1-qismida nazarda tutilgan maʼmuriy huquqbuzarlikni sodir qilgan deb topilsin va unga 5 sutka maʼmuriy qamoq jazosi tayinlandi.
