Toshkentda soxta Obodonlashtirish xodimlari ushlandi
Ular shu orqali ko‘chada tilanchilik qilishgan.
Toshkent ko‘chalarida go‘yoki "Obodonlashtirish xodimlari" qiyofasida avtoulov egalaridan pul so‘rab tilanchilik qilayotgan ayrim ayollar aniqlandi. Bu haqida Chilonzor tumani hokimligi maʼlum qildi.
Hokimlik eʼlon qilgan videoreportajda obodonlashtirish xodimlari murojaat bilan chiqib, chorrahalarda ayrim ayollar o‘zlarini obodonlashtirish xodimi sifatida tanishtirib, chorrahalarda avtomobil egalaridan pul so‘rayotgan ayollardan bu ishidan qaytishini so‘rashgan.
Hokimlik masʼul xodimlaridan biri ko‘chada obodonlashtirish xodimlarining kiyimlarini kiyib yurgan soxta xodimlarning oldiga borib, ularni so‘roqqa tutganida, ular Olmazor tumani hokimligi Obodonlashtirish bo‘limi xodimlari ekanini aytishgan. Shu vaqtda Obodonlashtirish bo‘limi rahbariga qo‘ng‘iroq qilinib, haqiqatda shunday xodimlar borligini so‘ralganida, tizimda bunday xodimlar yo‘qligi aniqlangan.
Soxta obodonlashtirish xodimlari ular haqiqatda xodim emasligini tan olib, pul topishga imkoni yo‘qligi, shu sabab shunday yo‘l orqali pul topishga majbur bo‘lganini aytishgan.
Shundan so‘ng Obodonlashtirishning haqiqiy ayol xodimalari ularga murojaat qilib, bu yo‘ldan qaytishini iltimos qilishgan.
