Navoiyda kiberxavfsizlik xodimi pora bilan ushlandi
U o‘z vakolatiga kiruvchi vazifani pul evaziga bajarmoqchi bo‘lgan.
Sudlanuvchi Navoiy viloyati IIB Tezkor qidiruv xizmatining Kiberxavfsizlik bo‘linmasi katta tezkor xodimi Karmana tumanida yashovchi fuqaroning plastik kartasidan 62 mln so‘m pul mablag‘ini noqonuniy yechib olgan shaxslarni aniqlab berish evaziga 600 AQSH dollari talab qilgan.
Bunday holatlarni fosh etish katta tezkor xodimning bevosita xizmat vazifasiga kirsada, u jabrlanuvchidan so‘ralgan pul mablag‘ini olgan vaqtida DXX va Iqtisodiy jinoyatlarga qarshi kurashish departamenti xodimlari tomonidan ashyoviy dalillar bilan ushlangan.
Sud hukmiga ko‘ra, sudlanuvchi JKning 210-moddasi 1-qismida nazarda tutilgan jinoyatni sodir etganlikda aybli deb topildi. Unga shu moddaning 1-qismi bilan 2 yil muddatga IIV tizimida ishlash huquqidan mahrum etilgan holda 3 yil muddatga ozodlikdan mahrum qilish jazosi tayinlandi.
