“Paxtakor” stadioni qayta taʼmirlanadi
Bahordan klub yana o‘z maydonida to‘p suradi.
Toshkentning “Paxtakor” stadioni to‘liq qayta taʼmirlanadi. Bu haqida klub raisi Jahongir Ortiqxo‘jayev maʼlum qildi.
Unga ko‘ra, stadion taʼmiri hozirdanoq boshlanadi va bahordan “Paxtakor” klubi yana o‘z maydonida to‘p suradi. Stadionning o‘rindiqlari va tablosi bilan bog‘liq muammolar ham bartaraf etiladi va maydon maysasi o‘zgartiriladi.
Eslatib o‘tamiz, joriy mavsum “Paxtakor” O‘zbekiston chempionatini 6-o‘rinda yakunladi. Jamoa Elit Chempionlar ligasida 6 ta turdan keyin 4 ochko bilan 9-o‘rinda bormoqda va hali pley-off yo‘llanmasi uchun imkoniyatlarini saqlab turibdi.
