Suriya o‘zining to‘rtinchi yirik shahridan ayrildi
Ayni paytda Damashqning shimoliga hujum davom etmoqda.
Suriyaning Daraa shahri jangsiz egallandi. Hukumat qo‘shinlari Damashq yo‘nalishiga xavfsiz chiqib ketishi sharti bilan, taslim bo‘lishdi. Bu haqida Reuters agentligi xabar bermoqda.
Iordaniya chegarasidagi ushbu shaharnining qo‘lga kiritilishi bilan, Asad rejimiga qarshi muxolifat kuchlarining hujumi yangi yo‘nalish – janubdan boshlandi. Aytish joizki, 2011 yilda aynan Daraa viloyatida boshlangan ommaviy tartibsizliklar keyinchalik butun mamlakat bo‘ylab yoyilgan fuqarolar urushiga aylangan edi.
Suriya hukumati shahardan chekinganini tasdiqlab, “qayta joylashuv” amalga oshirilganini va Daraa hamda unga qo‘shni As-Suvayda viloyatlarida “ishonchli mudofaa chizig‘i” o‘rnatilganini maʼlum qildi.
Suriya armiyasi bundan avval shimolda Halab va Hama, sharqda esa Dayr-az-Zor shaharlarini yo‘qotgan edi. Shuningdek, hozirda qurolli guruhlar Damashqning shimolidagi muhim shahar — Homsga hujumni davom ettirmoqda.
Reuters xabariga ko‘ra, Suriya armiyasi hozircha Homsdan siqib chiqarilmagan va bu hududga Asadga ittifoqchi bo‘lgan “Hizbulloh” kuchlari jalb qilinmoqda.
