Birjaga chiqariladigan benzin hajmi oshiriladi
Bu haqida Energetika vazirligi maʼlum qildi.
Aytilishicha, sovuq havo oqimi natijasida ayrim hududlardagi avtomobillarga gaz to‘ldirish kompressor shoxobchalari (gaz zapravkalar) faoliyatiga kiritilayotgan qisqa muddatli cheklov munosabati bilan birja savdolariga chiqarilayotgan avtobenzin hajmi vaqtinchalik ikki karra oshiriladi.
Maʼlum qilinishicha, buning uchun barcha hududlarda zarur miqdorda zaxiralar yaratilgan.
"Talab va taklifga qarab birja savdolariga joylashtirilayotgan avtobenzin hajmini yana-da oshirish imkoniyati mavjudligi maʼlum qilinadi.
Isteʼmolchilarning avtobenzinga bo‘lgan talabini to‘liq qondirish masalasi davlat nazoratiga olingan", — deyiladi xabarda.
Energetika vazirligi xususiy avtozapravkalar egalaridan narxlarni sunʼiy ravishda oshirmasliklari, avtobenzinni sifat va miqdor jihatidan to‘g‘ri sotishlarini so‘ragan.
Biroq birjaga chiqariladigan benzin hajmining tarkibi (80, 91/92,95) va propan hajmi oshirilishi haqida aytilmagan.
