Beruniyning XII asrga oid qo‘lyozmasi topildi
U qayerda va kim tomonidan ko‘chirilgani hozircha nomaʼlum.
Malayziyadagi Xalqaro Islom tafakkuri va sivilizatsiyasi instituti xuzuridagi Islom sivilizatsiyasi kutubxonasidan Abu Rayhon Beruniyning “At-Tafhim” asarining to‘qqiz asrlik va Abulqosim Firdavsiy qalamiga mansub “Shohnoma” asarining salkam olti asrlik qo‘lyozmalari topildi.
Bu haqida Malayziya poytaxti Kuala-Lumpur shahrida “Rossiya - Islom olami” strategik qarashlar guruhi tashabbusi bilan “Shakllanayotgan ko‘pqutblilik davrida Rossiya va Islom olami munosabatlari” mavzusida xalqaro anjumanda ishtirok etib qaytgan O‘zbekistondagi Islom sivilizatsiyasi markazi direktor o‘rinbosari Firdavs Halimov maʼlum qildi.
— Biz O‘zbekistonning Malayziyadagi favqulodda va muxtor elchisi Karomidin Gadoyev bilan Kuala-Lumpurdagi Islom sivilizatsiyasi kutubxonasiga bordik, — deydi Firdavs Halimov. — Bu yerda bevosita O‘zbekiston madaniy merosiga oid qo‘lyozmalar ham borligiga amin bo‘ldik. Qo‘lyozmalardan biri bu alloma Abu Rayhon Beruniy qalamiga mansub bo‘lgan “At-Tafhim” asaridir. Fors tilidagi, samo jismlarini o‘rganish masalalariga bag‘ishlangan bu asar 1197 yilda ko‘chirilgan.
Ikkinchi qo‘lyozma Abulqosim Firdavsiyning “Shohnoma” asarining o‘rta asrlarda ko‘chirilgan qo‘lyozmasidir. Qo‘lyozma nastaʼliq xatida temuriylar kitobat sanʼatiga xos uslubda ko‘chirilgan bo‘lib, undan 29 ta miniatyura o‘rin olgan. Ushbu miniatyuralarda Kamoliddin Behzod maktabiga xos unsurlar ko‘zga tashlanadi.
Mazkur qo‘lyozmalar qayerda va kim tomonidan ko‘chirilgani hozircha nomaʼlum. Maʼlum qilinishicha, ular o‘n yilcha ilgari Niderlandiyada o‘tkazilgan auksion savdosi orqali sotib olinib Malayziyaga keltirilgan.
Kutubxona rahbariyati mazkur qo‘lyozmalarning nusxalarini O‘zbekistondagi islom sivilizatsiyasi markaziga fondiga topshirishlarini maʼlum qilishdi.
