Toshkentda yangi kogeneratsiya qurilmasi ishga tushirildi
Bu haqida “Issiqlik elektr stansiyalari” AJ xabar berdi.
“Issiqlik elektr stansiyalari” AJ tomonidan poytaxtimizning Olmazor tumani “Shon-Shuhrat” mahallasi hududida investitsiya loyihasi asosida Turkiyaning “Iltekno” kompaniyasi bilan hamkorlikda yangi, zamonaviy hamda energotejamkor kogeneratsiya qurilmasi bunyod etildi. Qurilma ishiga kecha, “Congress Hall” majmuasida Prezidentimiz ishtirokida yangi investitsiya loyihalarini ishga tushirish marosimida start berildi.
Shunga ko‘ra, elektr energiyasi ishlab chiqarish quvvati 1,2 MVt, issiqlik energiyasi ishlab chiqarish quvvati 6,4 Gkalga teng bo‘lgan yangi qurilma poytaxtimizning Olmazor tumani “Shon-Shuhrat” mahallasi hududida qad rostladi.
Umumiy maydoni 0,16 gektarni tashkil qiluvchi zamonaviy energoinshootning umumiy loyiha qiymati 3,6 mln AQSH dollariga teng, u “Issiqlik elektr stansiyalari” AJ tomonidan Turkiyaning “Iltekno” kompaniyasi bilan hamkorlikda amalga oshirildi. Uning foydali ish koeffitsiyenti 80 foizdan yuqorini tashkil etadi.
Loyiha ishga tushirilishi natijasida yiliga 8 mln. kVt·soat elektr energiyasi hamda 52 ming Gkal issiqlik energiyasi ishlab chiqariladi. Loyiha asosida rivojlangan davlatlarning eng zamonaviy va yuqori tejamkor texnologiyalari o‘rnatilishi hisobiga yiliga 0,7 mln. kubmetr tabiiy gaz iqtisod qilinadi, atmosferaga chiqadigan ifloslantiruvchi moddalar hajmi 67 foizga kamayadi. Loyihaga ko‘ra, 10 ta yangi ish o‘rinlari yaratildi.
Bu yerda Germaniyadan keltirilgan gaz-porshen qurilmasi hamda ikkita “Bosch” qozonlari o‘rnatildi. Zamonaviy usulda qurilgan energoqurilmada ishlab chiqarilgan issiqlik energiyasi aholi xonadonlariga yopiq tizim orqali yetkazib berilishi tufayli yo‘qotishlar umuman kuzatilmaydi. Qurilma ishga tushirilishi natijasida, hududdagi 18 ta ko‘p qavatli uy, 1 ta maktab, 1 ta ijtimoiy soha obyekti va mingdan ortiq aholi xonadonlari barqaror ravishda issiqlik energiyasi bilan taʼminlanadi.
