Asad oilasining boyligi qancha?
The Wall Street Journal nashri bu haqidagi maʼlumotlarni ochiqladi.
Nashrga ko‘ra, Suriyada Bashar Asad rejimining qulashi bilan uning ko‘p yillik boshqaruvi davomida orttirgan milliardlariga global ov boshlandi.
"Inqilobdan oldin Asad oilasining pullarini yuvish uchun juda ko‘p vaqtlari bo‘lgan, ularda har doim “B” rejasi mavjud edi, oila qochishdan oldin yaxshi sharoitlarga ega bo‘ldi", — dedi nashrning suhbatdoshi Endryu Tabler (Tabler Oq uy sobiq xodimi, u Asadning aktivlarini aniqlash va ularga nisbatan sanksiyalar qo‘llash bilan shug‘ullangan).
Asad boyligining hajmi aniq emas, oila aʼzolarining qay biri bu aktivlarni nazorat qilishi ham nomaʼlum. Bashar Asadning qarindoshlari tomonidan yillar davomida amalga oshirilgan xalqaro xaridlar orasida Rossiyadagi hashamatli ko‘chmas mulklar, Venadagi butik mehmonxonalar va Dubaydagi shaxsiy samolyot bor. AQSH Davlat departamentining 2022 yil uchun hisobotida Asadlar bilan bog‘liq korxonalar va aktivlarning qiymati 12 milliard dollarga yetishi mumkinligi qayd etilgan.
Bu daromad asosan davlat monopoliyalari va giyohvand moddalar savdosi orqali orttirilgan.
