Sergelidagi “novostroyka”da aholi gazsiz yashayotgani aytilmoqda

Ijtimoiy tarmoqlarda Sergeli tumanidagi yangi qurilgan ko‘p qavatli turarjoyda aholi 5 yildan beri gazsiz yashayotgani aytilgan video tarqaldi.

 

Toshkent shahar Qurilish va uy-joy kommunal xo‘jaligi sohasida hududiy nazorat qilish inspeksiyasi mazkur holat bo‘yicha rasmiy munosabat bildirdi.

 

Qayd etilishicha, Yangihayot tumani Yo‘ldosh-6 mavzesidagi ushbu turar joy MCHJga tegishli bo‘lib, obyektda qurilish-montaj ishlari Hukumatning tegishli qarori asosida inspeksiyani xabardor etmagan holda o‘zboshimchalik bilan boshlab yuborilgan.

 

Ushbu holat yuzasidan MCHJga nisbatan 2021 yil 7 iyul kuni yozma ko‘rsatma berilgan. Biroq belgilangan kamchiliklar o‘z vaqtida bartaraf etilmagach, O‘zbekiston Respublikasi MJtKning 99-moddasi 7-qismida nazarda tutilgan maʼmuriy huquqbuzarliklar sodir etilganligi sababli MCHJ rahbariga sud organlari tomonidan jazo chorasi bilan bog‘liq qaror chiqarilgan. Xususan, mazkur masala yuzasidan Toshkent shahar Qurilish Bosh boshqarmasiga va O‘zbekiston Respublikasi Iqtisodiyot va moliya vazirligi huzuridagi Kadastr agentligi Toshkent shahar boshqarmasiga xatlar jo‘natilgan.

 

Shuningdek, 2024 yilning 2 iyulida ushbu obyektga tekshiruv o‘tkazish maqsadida chiqilganida qurilish ishlari to‘xtatilganligi aniqlangan va qurilishga javobgar mansabdor shaxslar joyiga yetib kelmaganligi sababli xolislar ishtirokida dalolatnoma tuzilgan.

 

2024 yil 5 noyabrda yana monitoring o‘tkazilgan hamda holat yuzasidan MCHJga yozma ko‘rsatma yuborilgan. Hozirgi kunda inspeksiya mazkur holat bo‘yicha sud organlariga tegishli tartibda chora ko‘rilishi yuzasidan daʼvo arizasi kiritmoqda.

 

“Quruvchi tashkilot va fuqarolar (subinvestor) o‘rtasida tuzilgan shartnoma shartlari bajarilishini nazorat qilish hududiy inspeksiya vakolatiga kirmaydi va mazkur qurilish obyekti inspeksiya ro‘yxatidan o‘tmaganligi sababli uyning kadastr hujjatlarini rasmiylashtirib berilishi tadbirkor MCHJning majburiyatidir”, deyiladi xabarda.