Rossiyadagi YTHda 5 nafar o‘zbekistonlik halok bo‘ldi
Bu haqida O‘zbekistonning Qozon shahridagi Bosh konsulxonasi xabar berdi.
Maʼlum qilinishicha, avtohalokat 17 dekabr ertalab soat 05:10 larda Ulyanovsk viloyatidan o‘tadigan Saransk — Surskoye — Ulyanovsk yo‘nalishidagi r-178 federal trassasining 209 kilometrida sodir bo‘lgan.
Yo‘l transport hodisasi oqibatida 5 nafar O‘zbekiston fuqarosi — 1977 yilda tug‘ilgan A.A., 1988 yilda tug‘ilgan J.I., 1975 yilda tug‘ilgan K.S., 2004 yilda tug‘ilgan K.A. va 1977 yilda tug‘ilgan B.O. halok bo‘lgan.
Rossiya IIV Ulyanovsk viloyati bo‘yicha boshqarmasi bergan maʼlumotga ko‘ra, besh kishi bo‘lgan Cobalt boshqaruvni yo‘qotib, qarama-qarshi yo‘lga chiqib ketgan va avtomobil harakatlanib kelayotgan “MAZ” yuk mashinasi bilan to‘qnashgan.
Ushbu holat Bosh konsulxona nazoratiga olingan. Vakolatli organlar bilan muvofiqlashtirish ishlari olib borilib, halok bo‘lganlarni jasadlarni vatanga qaytarish ishlarini amalga oshirish choralari ko‘rilmoqda.
