Farg‘onadagi barcha “zapravkalar” tekshiriladi
Bunga viloyatda yuz bergan baxtsiz hodisa sabab bo‘lgan.
Farg‘ona viloyati hududida faoliyat ko‘rsatayotgan barcha turdagi avtomobillarga yoqilg‘i quyish shoxobchalarining belgilangan norma va meʼyorlarga muvofiqligi holati o‘rganib chiqiladi. Bu haqida viloyat hokimining tegishli farmoyishi qabul qilindi.
“Baxtsiz va noxush hodisalarning oldini olish, xavfsizlik qoidalariga amal qilish, yo‘l qo‘yilgan kamchiliklarni bartaraf etish maqsadida “O‘zdavneftgazinspeksiya” Farg‘ona hududiy bo‘limi, viloyat favqulodda vaziyatlar boshqarmasi, “Hududgaz Farg‘ona” gaz taʼminoti filiali kabi masʼul tashkilotlar xodimlaridan iborat ishchi guruhi tuzildi. Mazkur ishchi guruhi tomonidan avtomobillarga gaz to‘ldirish kompressor stansiyalari (AGTKS), avtomobillarga gaz quyish stansiyalari (AGKS) va Avtomobillarga yoqilg‘i quyish stansiyalari (AYOQS)ning sanoat, yong‘in, ekologik xavfsizligi talablariga muvofiqligi, yoqilg‘i saqlash rezervuar (sig‘im)larning holati va boshqa qonunchilikdagi meʼyorlar o‘rganiladi. O‘rganishlar chog‘ida ularning moliyaviy ishlariga aralashmaydi hamda shoxobchalar odatdagi ish tartibi bo‘yicha faoliyat ko‘rsatadi”, deyiladi xabarda.
Shuningdek, viloyat hududida faoliyat yuritayotgan, tashkiliy-huquqiy shaklidan qatʼi nazar barcha avtomobillarga yoqilg‘i quyish, siqilgan va suyultirilgan gaz to‘ldirish shoxobchalarida ishlovchi ishchi-xodimlarni viloyat favqulodda vaziyatlar boshqarmasi qoshidagi o‘quv markazida dastur asosida shartli ravishda o‘qitilishi taʼminlanadi.
