O‘zbekiston va Hongkong o‘rtasida vizasiz tartib joriy etilishi mumkin
O‘zbekiston elchixonasi diplomatlari Xitoyning Hongkong maxsus maʼmuriy hududi hukumatining Pekindagi vakolatxonasi vakillari bilan muzokara o‘tkazdi.
Vakolatxonaning Immigratsiya ishlari bo‘yicha rahbari Vong Vey-ki Ksariyer bilan konsullik – huquqiy sohadagi ikki tomonlama hamkorlikka oid masalalar, Hongkong maxsus maʼmuriy hududida mavjud migratsiya qoidalari, xususan ikki tomonlama sayyohlik almashinuvini rivojlantirish bo‘yicha istiqboldagi rejalar muhokama qilindi.
Muzokaralar chog‘ida, shuningdek, Hongkong maxsus maʼmuriy hududining viza siyosati, tomonlar fuqarolarining huquq va manfaatlarini himoya qilish hamda O‘zbekiston va Hongkong o‘rtasidagi sohaga oid meʼyoriy-huquqiy bazani kengaytirish masalalari ko‘rib chiqildi.
2021 yil 1 martdan boshlab O‘zbekistonda xitoyliklar, shu jumladan, Xitoyning maxsus maʼmuriy hududlari – Hongkong va Makao fuqarolari uchun 10 kungacha vizasiz rejim amal qilib kelayotgani taʼkidlandi. Shuningdek, joriy yil 1 dekabr kuni Chendu shahrida "Xitoy Xalq Respublikasi Hukumati bilan O‘zbekiston Respublikasi Hukumati o‘rtasida o‘zaro vizadan ozod qilish to‘g‘risida"gi bitim imzolanganligi maʼlum qilindi. Hozirda mazkur hujjat kuchga kirishi uchun zarur bo‘lgan davlat ichki huquqiy protseduralaridan o‘tkazilayotgani qayd etildi.
Bundan tashqari, O‘zbekiston tomoni o‘z fuqarolari uchun Hongkong maxsus maʼmuriy hududi bilan viza talablaridan o‘zaro ozod etish to‘g‘risida kelishuvga erishishni maqsad qilgani bildirildi.
"Hongkong tomoni ham O‘zbekiston bilan barcha sohalarda ikki tomonlama hamkorlikni yana-da mustahkamlash, amaliy natijadorlikni oshirish, xususan, o‘zaro fuqarolar almashinuvini kengaytirish va turizm sohasini izchil rivojlantirishdan birdek manfaatdor", — dedi u.
Sohaga oid oldinda turgan masalalarni birgalikda hal etish bo‘yicha muloqotni davom ettirishga kelishib olindi.
