Boji to‘lanmay olib kirilgan mashina musodara qilindi
U belgilangan muddatda bojxona hududidan olib chiqib ketilmagan.
O‘zbekiston Respublikasining bojxona hududiga olib kirilgan transport vositasini bojxona hududidan tashqariga belgilangan muddatlarda olib chiqmaslik natijasida avtomashina musodara qilindi.
Sababi, huquqbuzar D.S. hamda A.D.lar 04 KG davlat belgisi bilan boshlanadigan “Lacetti” rusumli transport vositasini vaqtincha ruxsatnoma tugagandan so‘ng yurtimiz hududidan olib chiqib ketishi kerak bo‘lsa-da, olib chiqmasdan harakatlanib yurgan. Shuningdek, huquqbuzarlar maʼmuriy jazo chorasi qo‘llanilganidan keyin o‘ttiz kun ichida uni O‘zbekiston Respublikasining bojxona hududidan tashqariga olib chiqib ketishmagan.
Bundan tashqari, huquqbuzarlar o‘tkazib yuborilgan 349 kun muddat ichida to‘lanishi lozim bo‘lgan 47 939 850 so‘m miqdoridagi bojxona to‘lovini to‘lamagan.
Shunga ko‘ra, D.S. va A.D.larning harakatlari O‘zbekiston Respublikasi MJtKning 227-16-moddasi 3-qismi bilan kvalifikatsiya qilinib, sud tomonidan Xo‘jaobod tumanidagi jarima maydonchasida saqlanayotgan “Lacetti” rusumli transport vositasi musodara qilinishi bo‘yicha ijro hujjati Byuroning Xo‘jaobod tuman bo‘limiga yuborilgan.
Ijro hujjatining ijrosini taʼminlash maqsadida “Lacetti” avtomashinasi 60 938 000 so‘m boshlang‘ich qiymat bilan elektron onlayn-auksion savdosiga chiqarildi.
Kelgusida sotuvdan tushgan pul mablag‘lari davlat foydasiga o‘tkaziladi.
