Qashqadaryoda qariyb 200 mingta “paqildoq” to‘xtatib qolindi
Hozirda holat yuzasidan bojxona tekshiruvlari o‘tkazilmoqda.
Qashqadaryo viloyati bojxona boshqarmasi Kontrabandaga qarshi kurashish bo‘limi xodimlari viloyat Milliy gvardiya, IIB va YHXB xodimlari bilan hamkorlikda pirotexnika vositalarini noqonuniy realizatsiyasiga qarshi kurashish yo‘nalishida Ko‘kdala tumanida tezkor tadbir o‘tkazishdi.
Tadbir davomida “Toshkent-Qarshi” yo‘nalishida harakatlanib kelayotgan avtotransport vositasi to‘xtatilib, ko‘zdan kechirilganda, uning yukxonasida ko‘p miqdorda pirotexnika vositalari borligi maʼlum bo‘ldi.
Ushbu pirotexnika vositalari belgilangan tartibda sanoqdan o‘tkazilganda esa 8 dona karton qutilar ichida jami 196 200 dona petardalar joylashtirilganligi oshkor bo‘ldi. Mazkur vositalarning umumiy qiymati dastlabki hisob-kitoblarga ko‘ra qariyb 50 mln so‘mni tashkil etmoqda.
Hozirda holat yuzasidan bojxona tekshiruvlari olib borilmoqda.
