AQSH Rossiyaga qarshi sanksiyalarni kuchaytirishi mumkin
AQSHning bo‘lajak moliya vaziri shundan taklif bilan chiqdi.
AQSH moliya vaziri lavozimiga nomzod Skott Bessent Rossiyaga qarshi neft bo‘yicha sanksiyalarni kuchaytirishga chaqirdi. Bu haqida u 16 yanvar kuni AQSH Senati moliya qo‘mitasining eshituvlarida aytib o‘tdi.
Rossiya va Ukrainaga nisbatan siyosat masalasini senator-demokrat Mark Uorner ko‘tardi.
“Men shuni his qilyapmanki, biz Vladimir Putinga Ukrainadagi tajovuzkor va dahshatli xatti-harakatlari uchun munosib javob bera olmaymiz”, deb shikoyat qildi qonun chiqaruvchi.
“Biz yetarlicha ish qilganimiz yo‘q. Ochig‘ini aytganda, sanksiyalar rejimi, menimcha, kerak bo‘lgan darajada samarali bo‘lmadi. Bayden maʼmuriyati neft va tankerlarga qo‘shimcha sanksiyalarni joriy etishda juda kech qoldi, deb o‘ylayman”, deya qo‘shimcha qildi Uorner.
“Ukrainada sodir bo‘layotgan fojia ongli hayotimdagi eng katta fojialardan biridir. Men moliya vaziri etib tayinlansam, uni tezroq tugatishni xohlayman”, deb javob berdi Bessent.
Uning so‘zlariga ko‘ra, yaqin vaqtgacha AQSHning Rossiya neft sektoriga qarshi sanksiyalari juda zaif edi, chunki Bayden maʼmuriyati, ayniqsa, AQSHdagi saylov arafasida Rossiyadan eksport kamaysa, jahon bozorida va AQSHning o‘zida neft narxi oshishidan xavotirda bo‘lgan. Shu bilan birga, demokratlar mahalliy neft ishlab chiqarishni chekladilar, deya taʼkidladi moliya vaziri lavozimiga nomzod. Uning ishonch bildirishicha, AQSHda qazib olish hajmining oshishi Rossiya neft kompaniyalariga nisbatan sanksiyalarni kuchaytirish imkonini beradi.
