Samarqandda temiryo‘lga beton bo‘lagi tashlab ketildi
“Afrosiyob” poyezdi katta tezlikda kelib unga urilgan.
Beton bo‘lagini urib ketgan “Afrosiyob” poyezdi maʼlum muddat to‘xtab qolgan va manzilga qariyb 1,5 soat kechikib borgan. Poyezdda yuzdan ortiq yo‘lovchi bo‘lgan.
Samarqand viloyatining Paxtachi tumani hududida temiryo‘l ustiga beton bo‘lagi qo‘yib ketildi.
Maʼlum qilinishicha, nomaʼlum shaxs temiryo‘l chetida masofa yozilgan belgi ostidagi beton bo‘lakni kovlab olgan. So‘ngra uni temiryo‘l ustiga qo‘yib ketgan.
Buxoroga ketayotgan “Afrosiyob” tezyurar poyezdi beton bo‘lagiga katta tezlikda kelib urilgan va maʼlum muddat to‘xtab qolgan. So‘ngra yo‘lida davom etgan poyezd manzilga 1 soat 24 minut kechikib borgan.
Poyezdda 133 nafar yo‘lovchi bo‘lgan. Ularga tan jarohati yetmagan.
Hozircha holat qachon bo‘lgani, beton bo‘lagini temiryo‘lga kim va nima maqsadda qo‘yib ketgani, shuningdek, “Afrosiyob” poyezdiga yetkazilgan zarar miqdori maʼlum emas.
