Dunyodagi eng serqatnov aeroportlar

2024 yilda ham Atlanta Hartsfild-Jekson xalqaro aeroporti (AQSH) dunyodagi eng serqatnov aeroport sifatida birinchi o‘rinni saqlab qoldi.

 

Aviayo‘lovchilar oqimi statistikasini tahlil qiluvchi OAG kompaniyasining maʼlumotlariga ko‘ra, Atlanta aeroportidan yo‘lovchilar oqimi o‘tgan yilga nisbatan 2 foizga oshib, 62,74 million yo‘lovchi o‘rnini tashkil etdi. Ammo bu ko‘rsatkich pandemiyadan avvalgi, yaʼni 2019 yil darajasidan 1 foizga kam.

 

Ikkinchi o‘rinni saqlab qolgan Dubay xalqaro aeroporti (BAA) yo‘lovchi oqimini o‘tgan yilga nisbatan 7 foiz, 2019 yilga nisbatan esa 12 foizga oshirib, 60,24 million yo‘lovchiga xizmat ko‘rsatdi.

 

Uchinchi o‘rinda esa yana Tokio Xanedda xalqaro aeroporti (Yaponiya) qayd etildi. Ushbu aeroportda yo‘lovchi oqimi 2023 yilga nisbatan 5 foizga, 2019 yilga nisbatan esa 1 foizga oshib, 55,2 millionni tashkil etdi.

 

2024 yilda dunyodagi eng serqatnov 10 ta aeroportning reytingida keskin o‘zgarishlar kuzatilmagan. Reytingning dastlabki oltita pog‘onasi o‘tgan yilgi holatni takrorladi. Biroq Xitoyning aeroportlari o‘z pozitsiyalarini sezilarli darajada yaxshilashga muvaffaq bo‘ldi.

 

Xususan, Xitoyda pandemiya cheklovlari 2023 yil yanvar oyida bekor qilingandan so‘ng xalqaro Guangzhou-Bayyun aeroporti o‘z o‘rnini o‘ninchidan yettinchiga ko‘tarib, yo‘lovchi oqimini 2023 yilga nisbatan 12 foiz, 2019 yilga nisbatan esa 9 foizga oshirib, 48,85 millionga yetkazdi. Shuningdek, Shanxay Pudu aeroporti yo‘lovchi oqimini 2023 yilga nisbatan 29 foizga, 2019 yilga nisbatan esa 3 foizga oshirgan holda 15-o‘rindan 9-o‘ringa ko‘tarildi.

 

2024 yilda dunyodagi eng serqatnov aeroportlar reytingi:

 

• Xalqaro Atlanta Hartsfild-Jekson aeroporti (AQSH);
• Xalqaro Dubay aeroporti (BAA);
• Tokio Xanedda xalqaro aeroporti (Yaponiya);
• London Xitrou aeroporti (Buyuk Britaniya);
• Dallas/Fort-Uert xalqaro aeroporti (AQSH);
• Denver xalqaro aeroporti (AQSH);
• Guangzhou-Bayyun xalqaro aeroporti (Xitoy);
• Istanbul xalqaro aeroporti (Turkiya);
• Shanxay Pudun xalqaro aeroporti (Xitoy);
• Chikago O‘Hara xalqaro aeroporti (AQSH).